In 1978 het 11 kommersiële beesboere van die Vrede-Memel-Warden distrikte in die Noord-Oos Vrystaat oor die toekoms van hul onderskeie vleisbeeskuddes besin. Die uitdaging was om teeldoelwitte daar te stel wat ekonomies volhoubaar was.

Die volgende opsies is oorweeg naamlik:
- Suiwerteling,
- Kruisteling of
- ‘n Saamgestelde Ras (“Composite breeding”).

Saam met Dr. Hermann Venter, ‘n wêreld bekende veekundige en topstudent van wyle Prof. Jan Bonsma, het die groep boere, onder leiding van Dr. At Viljoen die volgende teelbeleid-beginsels aanvaar:

    ●  Die kombinasie van ‘n reeks goed gekose rasse om ‘n nuwe genepoel te vorm, lei tot verhoogde produktiwiteit en vinniger vordering met teling en seleksie.
    ●  Gewensde eienskappe kan makliker deur infusie ingebring word deur middel van rasse wat sterk staan in daardie eienskappe, teenoor suiwerteling of seleksie
        binne die ras.
    ●  Aangesien doeltreffende vleisproduksie die enigste doelwit is, behoort enige ras of raskombinasie wat ‘n bydrae kan maak, gebruik te word.
    ●  Kruisteling met suiwer rasse is voordelig maar is ingewikkeld en kan lei tot ondoelmatige telingspraktyke.
    ●  Deur moederkoeie te gebruik wat by jou plaas toestande aangepas is, kan ‘n groot mate van produktiwiteit in geskepte rasse opgestapel word.

Daar is toe besluit op ‘n Taurus-Indicus samestelling. Die HBSG het in 1986 tot stand gekom om aan hierdie beginsels gestalte te gee, die Bovelder is die naam wat toe aan hierdie saamgestelde ras gegee is.

Die studiegroeplede se kuddes het hoofsaaklik uit twee tipes bestaan naamlik:
    ●  Die Taurus groep
          ●  Simmentaler
          ●  Sussex
    ●  Die Indicus groep
          ●  Afrikaner
          ●  Bonsmara

Al die kuddes het ‘n opgraderingsfase ondergaan, waar klem geplaas is op die ras samestelling en die regstelling daarvan met toepaslike infusie. Om suksesvol daarmee te wees was die eerste stap om ‘n kudde klas vir alle lede te doen, tesame met prestasiegegewens wat verpligtend is vir al die gestabiliseerde Bovelder kuddes, sodat die volgende aspekte in die regte volgorde van belang vir elke kudde bepaal kon word.

    ●  Beste bulle by beste koeie
    ●  Aanvullende parings: Indicus/Taurus verhouding regstel vir aanpasbaarheid
    ●  Korrektiewe parings: Ekonomiese eienskappe te versterk of te korrigeer
    ●  Nie-funksionele diere te identifiseer
    ●  Tekortkominge in die kudde uit te wys
    ●  Beplanning van teeldoelwitte
    ●  Regte aankope van bulle en vroulike diere

Die resultaat van die volgehoue toewyding van die lede in groepsverband was ‘n Saamgestelde ras waarin die volgende eienskappe na bykans ‘n halwe eeu gevestig is.

    ●  Uitstekende aanpassingsvermoë en sterk konstitusie
    ●  Vrugbaarheid, gemak van kalwing en goeie speenmassa
    ●  Vry van erflike gebreke
    ●  Doeltreffende groeivermoë en voeromset
    ●  Goeie vleisbouvorm
    ●  Goeie temperament
    ●  Voortreflike pigmentasie
    ●  Rooi van kleur

Die hedendaagse Bovelder kan dus nou beskryf word as ‘n medium raam dier wat ongekompliseerd is en goed aanpas onder veld en voerkraal toestande. Dit is dus ‘n ras sonder “fancy points”. Hoogtepunte van die B.B.S.G

    ●  Ontwikkeling en Stabiliseering van die Bovelderras
    ●  Oudste aktiewe Bees Studiegroep in Suid Afrika
    ●  Uitsonderlike lidrentensie oor dekades
    ●  Kudde-bestuursprogram gesinkroniseerd vir alle lede
    ●  Hoogste pryse vir kommersiële bulle(brandmerk B) in SA
    ●  Keuring en Seleksie-intensiteit van bulle hoogste in SA
    ●  Lede presteer in Beesboer van die jaar kompetisie
    ●  Premie op pryse van speenkalwers
    ●  Bedingingsmag op alle gebiede bv. Bovelder winterlek geregistreer
    ●  Die ledetal het gegroei tot 70 aktiewe lede in 2026 met ‘n genepoel van ongeveer 70,000 teelkoeie.

Groot waardering en erkenning word gegee aan die volgende persone wat vanaf 1965 ‘n bydrae gemaak het tot die Bovelder se ontwikkeling:
Dr. Jan Lombaard
Dr. Roy Berg van die VSA en Kanada
Dr. Geoff Harwin
Dr. Alistair Paterson
Dr. W Ehret
Prof. Cas Maree
Roger Wood
Dr. Hermann Venter
Dr. At Viljoen